Her er forskingsresultata frå Shift-Plastics

Sentrale aktørar i ShiftPlastics-teamet samla i Bodø havn. Frå venstre: Megan Palmer-Abbs, Hans Jakob Walnum, Christian Karl, Paritosh Deshpande og Hilde Rødås Johnsen. Foto: Thoralf Fagertun

På det digitale sluttseminaret 24. september la prosjektleiar Hans Jakob Walnum fram konklusjonar frå tre års forsking på plastutfordringar innan fiskeri- og havbruksnæringane.

Shift-Plastics har arbeidd på tvers av sektorar, og forskarane har fått viktige innblikk via ei rekkje aktørar som står midt i utfordringane det er snakk om: fiskeri- og havbruksnæringa sjølv, dei som leverer utstyr til næringane, dei som står for resirkulering av brukt plast og ikkje minst: dei som utformar politikken på dette området.

På seminaret fortalte forskarane kva konkrete grep dei meiner styresmaktene bør ta for å få bukt med den omfattande bruken av plast og prøve å forlenge levetida til utstyret som alt er i bruk. Dei kom òg med råd om kva slags politikk som kan fremme berekraftig sirkulærøkonomi. I tillegg snakka dei om korleis næringane kan ta i bruk sirkulærøkonomiske prinsipp og utforske potensialet som ligg i teknologiske utbetringar.

I tillegg til presentasjonane på sluttseminaret, blir forskingsresultata snart tilgjengelege i bokform, når boka Managing Marine Plastic Pollution in Norway kjem ut tidleg neste år.

– I boka samanfattar vi arbeidet i dei ulike arbeidspakkane og viser korleis norsk fiskeri og havbruk kan handtere plast i tråd med ein berekraftig sirkulærøkonomi. Boka speglar det tette samarbeidet mellom forsking og næring, og vi håpar resultata blir tekne aktivt i bruk – både i politikk og av næringa sjølv, seier Walnum.

Les presentasjonane her:

Hans Jakob Walnum: Towards a sustainable circular economy: Project achievements

Megan Palmer-Abbs: Key recommendations: Short, medium, and long term

Paritosh C. Deshpande: Short-term actions: Filling data gaps

Marharyta Kryva: Presentation of project on traceable ropes

Heidi Ruud: Nofir and new PRO